ބީޗް ވޮލީ ޓީމުން ރިހި މެޑަލް ހޯދައިފި

22 ޖުލައި 2019

އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ ބީޗް ވޮލީބޯޅައިގެ ފިރިހެން ޓީމު އިވެންޓުން ރާއްޖެއިން ރިހި މެޑަލް ހޯދައިފިއެވެ.

ޓީމު އިވެންޓުގައި ރާއްޖޭގެ ޓީމުން ވަނީ ކުޅުނު 4 މެޗުގެ ތެރެއިން 3 މެޗުން މޮޅުވެފައެވެ. އެހެންކަމުން ރާއްޖެއަށް ލިބުނީ ދެވަނައެވެ. މިއީ އައިއޯއައިޖީގައި ބީޗް ވޮލީން ހޯދި ފުރަތަމަ މެޑެއްޔެވެ.

މުބާރާތުގައި މިއަދު ސީޝެލްސް އަތުން ރާއްޖެ މޮޅުވީ 2 ގޭމުންނެވެ. މެޗުގެ ފުރަތަމަ ޓައި ރާއްޖެ ކާމިޔާބުކުރީ 21-18 އަދި 21-18 އިންނެވެ. ދެވަނަ ޓައި ރާއްޖެއިން ކާމިޔާބުކުރީ 21-13 އަދި 21-14 އިންނެވެ.

އަދި އިއްޔެ ރާއްޖޭގެ ޓީމުން ވަނީ މޮރިޝަސް އަތުން 2-1 އިން މޮޅުވެފައެވެ. ފުރަތަމަ ޓައި ރާއްޖެއިން ކާމިޔާބުކުރީ 21-14 އަދި 21-0 އިންނެވެ. އެކަމަކު ދެވަނަ ޓައިގައި ރާއްޖޭގެ ޓީމު ވަނީ 21-18 އަދި 21-15 އިން ބަލިވެފައެވެ. ނަތީޖާ ނެރުމަށް ކުޅުނު ޓައި ރާއްޖޭގެ ޓީމުން ކާމިޔާބުކުރީ 23-21 އަދި 21-18 އިންނެވެ.

މީގެ ކުރިން ރާއްޖެ ވަނީ ކޮމޮރޯސް އަތުންވެސް މޮޅުވެފައެވެ. ކޮމޮރޯސް އަތުން މޮޅުވީ 2-1 އިންނެވެ. ފުރަތަމަ ޓައި ރާއްޖޭގެ ޓީމުން ކާމިޔާބުކުރީ 21-19، 14-21 އަދި 10-15 އިންނެވެ. އެކަމަކު މެޗުގެ ދެވަނަ ޓައި ކޮމޮރޯސްއިން ކާމިޔާބުކުރީ 21-12 އަދި 21-18 އިންނެވެ. ނަތީޖާ ނެރުމަށް ކުޅުނު ޓައި ރާއްޖޭގެ ޓީމުން ކާމިޔާބުކުރީ 18-21 އަދި 17-21 އިންނެވެ. މި އިވެންޓުގައި ރާއްޖެ ބަލިވީ ރީޔޫނިއަން އަތުން އެކަންޏެވެ.

މިއަހަރު އައިއޯއައިޖީގައި ބީޗް ވޮލީގައި ރާއްޖެއިން ބައިވެރިވީ ފިރިހެން ބައިގައި އެކަންޏެވެ. 

---